"ചന്ദന ചര്‍ച്ചിത നീല കളേബര"

#100DaysOfSongs - പാട്ടോർമ്മകളുടെ നൂറുദിനരാത്രങ്ങൾ!

വർഷം 1985-86 മുതൽ!

നാവായിക്കുളത്തെ ആ വീടിനു പുറത്തിറങ്ങി ഇടത്തേക്ക് നോക്കിയാൽ ശങ്കര നാരായണ സ്വാമിക്ഷേത്രം എന്ന വല്ല്യമ്പലത്തിന്‍റെ മതിൽ കാണാം, വലത്തേക്ക് നോക്കിയാൽ അമ്മൻ കോവിൽ എന്ന കുഞ്ഞമ്പലം കാണാം. 2 മിനിറ്റ് ഒറ്റ ഓട്ടം ഓടിയാൽ വല്യമ്പലം എത്തി, എത്രയോ ഉത്സവ രാത്രികളിൽ നാടകത്തിന്റെ ഇടവേളകളിൽ - കഥകളി ബോറടിക്കുമ്പോള്‍ ഒക്കെ ഞാൻ വീട്ടില് വെള്ളം കുടിക്കാൻ വന്നിരിക്കുന്നു, അതും തനിച്ച് .. !ഇന്ന് അങ്ങനെ ചെയ്യാൻ ധൈര്യം ഉണ്ടോ? ചെറിയ മകളെ/മകനെ അങ്ങനെ വിടുമോ എന്നൊക്കെ ചോദിച്ചാൽ ഉത്തരം ഇല്ല :(

വീട്ടിലെ മിക്ക കാര്യങ്ങളും ഈ രണ്ട് അമ്പലത്തിലെ സമയം അനുസരിച്ചായിരുന്നു. അലാറമൊന്നും വേണ്ട - രാവിലെ അമ്മ ഉണരുന്നത് അമ്മൻ കോവിലിൽ 'മൈക്ക്' രഘു മാമൻ കീർത്തനങ്ങൾ ഇടുമ്പോഴായിരുന്നു... വല്ല്യമ്പലത്തിൽ അതിനും മുന്നേ പാട്ട് തുടങ്ങും, അപ്പോൾ ഒന്നുറക്കം ഉണര്ന്നു അമ്മ ഉറക്കത്തിനെ മയക്കം ആക്കി കിടക്കും. 5 മിനുട്ട് 'snooze' ടൈം കഴിഞ്ഞാൽ ചെറ്യ അമ്പലത്തിലെ പാട്ട് കേൾക്കുമ്പോൾ ഉണരാം . ഉച്ചയ്ക്ക് കിഴക്കേ നടയിൽ എവിടേക്ക് എങ്കിലും പോകണം എങ്കിൽ 12 മണിക്ക് മുന്‍പ് പോകണം, ഇല്ലെങ്കിൽ അമ്പലത്തിന്റെ ഗേറ്റ് അടയ്ക്കും.. പിന്നെ ചുറ്റിക്കറങ്ങി വേണം മുന്‍ ഭാഗത്ത് എത്താൻ (അമ്പലവഴി പൊതുവഴി ആക്കി എന്ന് പറഞ്ഞു ആരും വഴക്കിനു വരണ്ട, അത് ഞങ്ങടെ അവകാശമാ). വൈകിട്ടത്തെ പാട്ട് തുടങ്ങിയാൽ അറിയാം 5 മണിയായി - "ചന്ദന ചര്‍ച്ചിത നീല കളേബര " ഗാനഗന്ധര്‍വന്‍റെ ശബ്ദം ഒഴുകിയെത്തും . ദീപാരാധന മണി മുഴങ്ങുമ്പോൾ മിക്കവാറും ഞാനും സംഘവും അമ്പലത്തിൽ ഹാജര് ഉണ്ടാകും പ്രസാദപ്പായസം വാങ്ങാൻ - ഒരില കയ്യില്‍, ഒരു തൂക്കുപാത്രം മറുകയ്യില്‍ . ഇലയിലത് അപ്പോള്‍ തന്നെ വയറ്റില്‍ പോകും, തൂക്കുപാത്രത്തില്‍ വാങ്ങുന്നത് വീട്ടിലേക്ക് കൊണ്ട് പോകാനാണ് - ഇമ്മാതിരി "പബ്ലിക് കഴിക്കല്‍" അത്രയ്ക്ക് ഇഷ്ടമില്ലാത്ത ചേട്ടന്മാര്‍ക്കും കൂടി കൊടുത്ത് അടി കൂടി കഴിക്കാന്‍.

ഭക്തിയിലും നൊസ്റ്റാൾജിയ ഉണ്ടോ എന്നെനിക്കറിയില്ല - പക്ഷേ, എന്‍റെ അമ്പല വിശേഷങ്ങള്‍, ഈ പാട്ടുകൾ ഒക്കെ എന്റെ ഗൃഹാതുരതയാണ്... "ചന്ദന ചർച്ചിത നീല കളേബരം, ചെമ്പൈക്കു നാദം നിലച്ചപ്പോള, രാധ തന്‍ പ്രേമത്തോടാണോ, യമുനയിൽ " ഈ പാട്ടുകള്‍ കേട്ടാല്‍ ഞാന്‍ അറിയാതെ ശങ്കര നാരായണ സ്വാമി ക്ഷേത്ര പരിസരത്തെത്തും... ആല്ച്ചുവടും, ചന്ദന ഗന്ധവും ദാസേട്ടന്റെ ശബ്ദവും.... ആഹാ ...! "മയില്‍‌പ്പീലി" എന്ന ആല്‍ബത്തിലേതാണ് ഈ ഗാനങ്ങള്‍ എന്നൊക്കെ ഞാനറിഞ്ഞത് പിന്നീടാണ്. ഇന്നും ഒറ്റനിമിഷം കൊണ്ടെന്നെ ഏഴു കടലിനും എഴുപതിനായിരം മൈലിനും അപ്പുറം നാവായിക്കുളം വല്യമ്പലത്തിലെ പഞ്ചാരമണലിൽ എത്തിക്കാൻ ഈ പാട്ടൊന്ന് കേട്ടാൽ മതി!

ജയവിജയ സംഗീതത്തിലെ ആ സ്വർഗീയഗാനം ഇന്നത്തെ പാട്ടോർമ്മ.

https://youtu.be/ZT3F_GZQQ1E
--------------------------------------------------------------------------------------------------------------------------------------

#HundredDaysOfSongs നൂറു ദിവസത്തേക്ക് വളരെയേറെ പ്രിയപ്പെട്ട നൂറു പാട്ടുകൾ - അല്ലെങ്കിൽ നൂറുപേരെ ഓർമയിലേക്ക് കൊണ്ടുവരുന്ന പാട്ടുകൾ ചെറുകുറിപ്പുകളോടെ നിങ്ങളോട് പങ്കുവെയ്ക്കുകയാണ്.
#100DaysToLove
#100DaysOfSongs
#Day69