നിനക്കായി മാത്രം

എന്‍റെ സ്വപ്നങ്ങളില്‍ നിറങ്ങളില്ലായിരുന്നു ,
എന്‍റെ ചിന്തകള്‍ക്ക് സുഗന്ധവും
എന്നിട്ടും ഞാനവ, നിനക്കായി -
നിനക്കായി മാത്രം കാത്തു വെച്ചില്ലേ?

എന്‍റെ മഴക്കാടുകള്‍ നിനക്കായി മാത്രം
പൂക്കാതെ കാതോര്‍ത്തു നിന്നില്ലേ
നിന്നിലെ തീക്ഷ്ണ വികാരങ്ങളെനിക്കായി
മാത്രമുള്ളതാണെന്ന് ഞാന്‍ നിനച്ചിരുന്നു

എന്‍റെ സ്വപ്നങ്ങളില്‍ വാന്‍ഗോഗ് ഉണ്ടായിരുന്നില്ല
ചങ്ങമ്പുഴയോ വേര്‍ഡ്സ് വര്‍ത്തോ പോലും
എന്നിട്ടും നിന്നെ ഞാന്‍ പ്രണയിച്ചു !

നിനക്ക് ഞാനെന്‍റെ കമിതാവിന്റെ
സ്ഥാനം നല്‍കിയതിന്റെ അര്‍ത്ഥമെന്താണ് ?
അറിയില്ല,ഇന്നുമറിയില്ല .

നിനക്കായി ഞാനിന്നും, എന്നും കാത്തി-
-രുന്നിട്ടുമെന്നെ നീ കാണാതെ പോയി
എത്രയോ പേരെ നീ പ്രണയിച്ചു-
എന്നിട്ടുമെന്നെ നീ...!

ഉയരങ്ങളില്‍ നില്‍ക്കുമ്പോഴൊരു കൊടും-
-കാറ്റായി നീയെന്നെ പുണരുമെന്നും
ആഴക്കടലായി നീയെന്നെ പുല്കുമെന്നും
ഞാന്‍ വ്യാമോഹിച്ചുവല്ലോ!

നിന്‍റെ  കറുപ്പില്‍ ഞാനേഴല്ല
ഏഴായിരം വര്‍ണ്ണങ്ങള്‍ കണ്ടിരുന്നു.
ഞാനീ ജീവിതത്തെ സ്നേഹിക്കുന്നതിനു
മുന്‍പ് , നീയെന്‍ പ്രിയമൃത്യുവേ
കടന്നു വരിക, എന്നിലേക്ക്..എന്നിലേക്ക് !