' ഹം ദോസ്ത് ധെ, ഹൈ, രഹേൻഗേ.... ഹമേശാ

#100DaysOfSongs - പാട്ടോർമ്മകളുടെ നൂറുദിനരാത്രങ്ങൾ!

വർഷം 2001

LBS എഞ്ചിനീറിംഗ് കോളേജിലെ ആൺസുഹൃത്തുക്കളിലെ എനിക്ക് ഏറ്റവും പ്രിയപ്പെട്ടവൻ... ഇപ്പോഴും വർഷങ്ങൾ മിണ്ടാതെയിരുന്നാലും എടാ / എന്താടീ എന്ന ഒരു ചോദ്യത്തോടെ കടന്നുവന്ന് ഇന്നലെ സംസാരിച്ചു നിർത്തിയതുപോലെ സംസാരിക്കുന്നവൻ... നാലുവർഷവും നല്ല ചങ്ക് സുഹൃത്തായിരുന്നവൻ... നാലുവർഷം കഴിഞ്ഞിട്ടും കാലങ്ങൾ കഴിഞ്ഞിട്ടും സൗഹൃദത്തിന്റെ അതേ പടവിൽ നിൽക്കുന്നവൻ.. ഇപ്പോഴും 'നീയൊരു കൂതറയാണ്' എന്ന് ചൊടിപ്പിക്കാൻ പറയുന്നവൻ - ഇതൊക്കെയാണ് എനിക്ക് വർക്കി.

ആ വർക്കിയുടെ ഓർമ്മപ്പാട്ടാകട്ടെ ഇന്ന്! കോളേജിലെ ബോറടിയൻ ക്‌ളാസ്സ്‌റൂമുകളിൽ അങ്ങേയറ്റത്ത് ഏതേലും കോണിൽ ഇരിക്കുന്ന ചെക്കന്മാരെയും പെണ്ണുങ്ങളെയും ഉന്നം വെച്ചുള്ള ചിറ്റുകൾ പാസ്സ് ചെയ്ത് പൊയ്ക്കൊണ്ടേ ഇരിക്കും. ചുവന്ന ചെക്ക് ഷർട്ടിട്ടു വന്നിരുന്ന ക്‌ളാസിൽ അധികം സംസാരിക്കാത്ത ചുള്ളൻ ചെക്കനെ വട്ടാക്കാൻ സ്ഥിരമായി ചിറ്റെഴുതിയിരുന്ന ഒരു ടീമുണ്ടായിരുന്നു ഞങ്ങളുടെ ഇടയിൽ. അന്നത്തെ ചുള്ളൻ അബി ഇതൊക്കെ ഓർക്കുന്നുണ്ടാകുമോ എന്തോ! മരമാക്രി എന്നെഴുതി അയക്കുന്നതിനു 'പൊട്ടത്തി' എന്ന് തിരികെ വന്നാൽ ഉറപ്പിക്കാം അത് ലവൻ തന്നെ വർക്കി. കാസറഗോഡുകാരനായ വർക്കിയുടെ പൊട്ടന്റെ സ്ത്രീലിംഗം ആണ് പൊട്ടത്തി. (വർക്കി വട്ടപ്പേരാണ്, ശരിക്കുള്ള പേര് പറഞ്ഞാൽ അത് അവനാണ് എന്ന് തോന്നില്ല അതാ :D )

ഒരിക്കൽ അവൻ എഴുതി അയച്ച തുണ്ട് കടലാസ്സിൽ അപ്പോഴത്തേ ഒരു സൂപ്പർ ഹിറ്റ്‌ പടത്തിലെ ഡയലോഗ് ആയിരുന്നു - ' ഹം ദോസ്ത് ധെ, ഹൈ, രഹേൻഗേ.... ഹമേശാ ' (Hum Dost the, hain, rahenge… Hamesha). എന്തോ കാര്യത്തിന് വളരെ അസ്വസ്ഥയായിരുന്ന എനിക്ക് ആ ചെറിയ തുണ്ടുകടലാസിലെ ചുരുട്ടിയെറിഞ്ഞ വരികൾ വല്ലാത്ത ആശ്വാസം തന്നു. ആ കടലാസ് ഇപ്പോഴും പഴയ സിനിമയിലെ ഉർവശിയെപ്പോലെ ഞാൻ നാട്ടിലെ വീട്ടിലെ എന്റെ തക്കിട തരികിട പെട്ടിയിൽ സൂക്ഷിച്ചിട്ടുണ്ട് എന്ന് പറഞ്ഞാൽ മനസിലാകുമല്ലോ ആ കുറിപ്പ് തന്ന സന്തോഷം. അന്നുമുതൽ ഇന്നുവരെ ആ സിനിമയും അതിലെ പാട്ടുകളും എനിക്ക് വർക്കിയാണ്. അക്കൊല്ലം തന്നെ കോളേജിൽ ഫിലിം ഫെസ്റ്റിവലിന് ആ സിനിമ വന്നൂട്ടാ ... കോളേജ് പിള്ളേരുടെ പൾസ് അറിഞ്ഞ പടം - ദിൽ ചാഹ്താ ഹൈ. അതുകണ്ട് ഗോവയിൽ പോകണം എന്ന മോഹവും കൊണ്ട് ഞാൻ നടക്കാൻ തുടങ്ങിയിട്ട് കൊല്ലം കുറെയായി!

കാലം പിന്നെയും ഉരുണ്ടു.. വിഷുവും വർഷവും ഓണവും ക്രിസ്തുമസും ഒക്കെ വന്നുപോയി.. തുടക്കത്തിൽ പറഞ്ഞതുപോലെ ഇപ്പോഴും ഒരു വിളിക്കപ്പുറം ഉണ്ടെന്ന് ഉറപ്പിക്കുന്ന വിരലിലെണ്ണാവുന്ന സൗഹൃദങ്ങളിൽ അവനുണ്ട് - hameshaa! ആ പഴയ സ്വഭാവത്തിന് ഒരു മാറ്റോം വരുത്താതെ :D

ഈ ആശാൻ fb യിൽ ഒന്നുമില്ല ഇപ്പോൾ, അതുകൊണ്ട് ടാഗ് ചെയ്യാനും നിർവാഹമില്ല :/ അവൻ വായിക്കുമായിരുന്നു എങ്കിൽ ഓനെ ഇത്രോം പുകഴ്ത്തി എന്റെ ബൗ ബൗ എഴുതിയേനെ എന്നത് വേറെ വിഷയം ;)

https://youtu.be/Xmvzjan0z9c നൂറു ദിവസത്തേക്ക് വളരെയേറെ പ്രിയപ്പെട്ട നൂറു പാട്ടുകൾ - അല്ലെങ്കിൽ നൂറുപേരെ ഓർമയിലേക്ക് കൊണ്ടുവരുന്ന പാട്ടുകൾ ചെറുകുറിപ്പുകളോടെ നിങ്ങളോട് പങ്കുവെയ്ക്കുകയാണ്.
#100SongsToLove

#100DaysOfSongs

#Day98