ഇന്നീക്കൊച്ചുവരമ്പിന് മേലെ കൊയ്തെടുക്കണ കതിരോണ്ട്

#100DaysOfSongs - പാട്ടോർമ്മകളുടെ നൂറുദിനരാത്രങ്ങൾ!

വർഷം 1993

അക്കൊല്ലത്തെ വിഷുനു തൊട്ടുമുൻപേയായിരുന്നു അച്ഛന്റെ ഇളയ അനിയന്റെ (ഹരി അപ്പാപ്പൻ) കല്യാണം കഴിഞ്ഞത്. പത്തനംതിട്ടയായിരുന്നു കുഞ്ഞയുടെ വീട്. ഒരു ആശ്രമം പോലെയൊരിടത്തായിരുന്നു കല്യാണം നടന്നതെന്ന് ഓർക്കുന്നുണ്ട്. മെലിഞ്ഞു കുറുകിയ ശരീരമുള്ള ഓമനക്കുഞ്ഞയും നീണ്ടുമെലിഞ്ഞ ഹരിപ്പാനും ഒരു ജയാബച്ചൻ - അമിതാബ് ബച്ചൻ കല്യാണചിത്രം പോലെ ചിരിക്കുന്നുണ്ട് ഉള്ളിലിപ്പോഴും. കല്യാണം കഴിഞ്ഞെത്തിയ പുതുപ്പെണ്ണ് വിഷുന്റെയന്ന് രാവിലെ അടുക്കളക്കപ്പുറത്തിരുന്ന് കലവും പാത്രവും ചാരമിട്ടു മോറുന്നത് കണ്ടാണ് ഞാൻ എഴുന്നേറ്റ് വന്നത് - ഉറക്കപ്പായിൽ നിന്നെഴുന്നേറ്റ് കണി കണ്ടെങ്കിലും എന്റെയുള്ളിലെ ആ വിഷുവിന്റെ ഓർമ ഓമനക്കുഞ്ഞമ്മയുടെ അടുത്ത് പോയി വായും പൊളിച്ചിരുന്ന് കുഞ്ഞമ്മ പാത്രം മെഴുക്കുന്നതിന്റെ ഭംഗി നോക്കിയതാണ്.

പുതിയ പെണ്ണിനേയും ചെറുക്കനേയും ഒരു പുത്തൻ പുത്യേ തിരപ്പടം കാണിക്കാൻ വിട്ടാലോ എന്നുള്ള ഐഡിയ ആരുടേത് ആയിരുന്നു എന്നോർമ്മയില്ല , പക്ഷേ അതിനുവേണ്ടി നല്ലോണം ചരടുവലിച്ചത് ഞാനാണ് - കാരണം സോ സിമ്പിൾ, എന്നേം കൊണ്ടുപോകുമല്ലോ! അവസാനം അവർ സിനിമ കാണാൻ പോകാൻ തീരുമാനമായി, വീട്ടിൽ വേറെയാർക്കും ഒരു ഇന്ററെസ്റ്റും ഇല്ല കൂടെപ്പോകാൻ (സ്വാഭാവികം - കല്യാണം കഴിഞ്ഞ പുതുജോഡികൾ സിനിമ കാണാൻ പോകുന്നിടത്ത് പൂച്ചയ്ക്കെന്ത് കാര്യം? ) - എനിക്കൊഴികെ! എന്നോടാരും പോകണ്ട എന്ന് പറഞ്ഞില്ലല്ലോ - കുഞ്ഞമ്മയോട് സിനിമയെക്കുറിച്ചും സിനിമ കാണുന്നതിന്റെ ഗുണങ്ങളെക്കുറിച്ചുമൊക്കെ വാതോരാതെ വർണിച്ചാകണം ആൾക്ക് പിടികിട്ടി എന്റെ സിനിമാപ്രാന്ത്. അങ്ങനെ എൻ്റെ സീറ്റ് ഞാൻ ഒപ്പിച്ചു, അപ്പോൾപ്പിന്നെ അമ്മയും കൂടെപ്പോരട്ടെ എന്ന് തീരുമാനമായി. അങ്ങനെയെങ്കിലും ഞാൻ ഇച്ചിരെ മാറിയിരിക്കുമല്ലോ എന്ന് കരുതിയാകണം 'അമ്മ ആ കടുംകൈക്ക് തയ്യാറായത്.

ചങ്ങനാശ്ശേരി ടൗണിൽ എത്തിക്കഴിഞ്ഞാണ് ഏത് സിനിമ കാണണമെന്ന് ചിന്തിക്കുന്നത് തന്നെ. എനിക്ക് ഏതുപടവും ഒരേപോലെ - നോ പ്രയോറിറ്റി! ഹരിപ്പാനും അങ്ങനെതന്നെ - അപ്പോൾപ്പിന്നെ പന്ത് കൂടെയുള്ള മറ്റുരണ്ടുപേർക്ക് കിട്ടി. വേറെ ഏതോ മോഹൻലാൽ പടം ഉണ്ടായിരുന്നു എന്ന് തോന്നുന്നു (ദേവാസുരം ആണോ എന്ന് സംശയമുണ്ട്) - പക്ഷേ, അന്ന് അമ്മയും കുഞ്ഞമ്മയും കൂടി തിരഞ്ഞെടുത്തത് 'കുടുബസദസ്സുകൾക്ക് വേണ്ടി' എന്ന ടാഗ്‌ലൈനുമായി ഇറങ്ങിയ ഒരു പടമായിരുന്നു - പടത്തിന്റെ പേര് വാത്സല്യം! കല്യാണം കഴിഞ്ഞ ഉടനെപോയി കാണാൻ പറ്റിയ പടമാണ് :) ഹമ്മേ .... കരഞ്ഞുകരഞ്ഞു ഒരു വഴിക്കായി എന്ന് പറഞ്ഞാൽ മതിയല്ലോ.

കാലം പിന്നെയുമുരുണ്ടു .. വിഷുവും ഓണവും ക്രിസ്തുമസും ഒക്കെക്കടന്നുപോയി ... ഓരോ തളിരിനും പൂവും കായും വന്നു .. ചില മരങ്ങളൊക്കെ ഓർമ്മകൾ മാത്രംബാക്കിയാക്കിക്കൊണ്ട് നിലം പറ്റുകയും ചെയ്തു - ഹരിപ്പാനെപ്പോലെ!

ഈ സിനിമയുടെ സംവിധായകനും തല കാണിച്ച ഒരു പാട്ടുണ്ട് ഇതിൽ ... വിഷുവൊക്കെയല്ലേ ഇന്നത്തെ പാട്ടോർമ്മ - " ഇന്നീക്കൊച്ചുവരമ്പിന് മേലെ കൊയ്തെടുക്കണ കതിരോണ്ട് "സദ്യയൊരുക്കുന്ന ഓർമകളിലേക്ക് .....

https://www.youtube.com/watch?v=Kys225CPSRw

-----------------------------------------------------------------------------------
#100DaysOfSongs - നൂറു ദിവസത്തേക്ക് വളരെയേറെ പ്രിയപ്പെട്ട നൂറു പാട്ടുകൾ - അല്ലെങ്കിൽ നൂറുപേരെ ഓർമയിലേക്ക് കൊണ്ടുവരുന്ന പാട്ടുകൾ ചെറുകുറിപ്പുകളോടെ നിങ്ങളോട് പങ്കുവെയ്ക്കുകയാണ്.
#100DaysToLove
#100SongsToLove
#Day89