രുചിയോർമ്മകൾ 01 - ഉള്ളിത്തീയൽ

രുചിയോർമ്മകൾ അഥവാ ആളോർമ്മയുടെ രുചിഭേദം 

------------------------------------------------------------------------------------------ 

പാട്ടുകൾ കഴിഞ്ഞാൽ ഏറ്റവും കൂടുതൽ ഞാൻ ആളുകളുമായി ബന്ധപ്പെടുത്തി ഓർക്കുന്ന ഒന്നാണ് ഭക്ഷണം... അല്ല! അങ്ങനെ അല്ല പറയേണ്ടത്, ചില രുചികളുമായി ചേർത്താണ് ചിലർ എന്നിൽ ഓർമ്മകളിൽ ചുറ്റിപ്പിണഞ്ഞു കിടക്കുന്നത്. എനിക്കേറ്റവും പ്രിയപ്പെട്ടവർ മുതൽ ജീവിതത്തിൽ ഒരിക്കൽ മാത്രം കണ്ടവരും ഇനിയൊരിക്കലും കാണാൻ സാദ്ധ്യതയില്ലാത്തവരും ഒക്കെ ചില  രുചികളിലൂടെ, ചില ഭക്ഷണസാധനങ്ങളുടെ കാഴ്ചയിലൂടെ, മണത്തിലൂടെ എന്നിലേക്ക് കടന്നു വരാറുണ്ട്. എന്റെ ദൈനം ദിന ജീവിതത്തിലെ നിമിഷത്തിന്റെ ഒരു പങ്ക് ഇങ്ങനെ ചിലപ്പോഴെങ്കിലും അവരറിയാതെ കട്ടെടുക്കാറുമുണ്ട്.  അങ്ങനെ എന്നെയാരെങ്കിലും ഓർക്കുമോ എന്നെനിക്ക് ഉറപ്പില്ല -എന്നെപ്പോലെ ഇത്തരം ഒരു വിചിത്ര സ്വഭാവമാർക്കേലും ഉണ്ടോ എന്നും അറിയില്ല. എന്റെ ഓർമ്മയിലേക്ക് കയറിയ നൂറു രുചിയോർമ്മകളാണ് ഇന്ന് മുതൽ ഇവിടെ നിങ്ങളോട് പങ്കു വെയ്ക്കുന്നത്! ഇതിൽ പാചക ക്കൂട്ടുകൾ ഉണ്ടാകും എന്ന് പ്രതീക്ഷിക്കണ്ട കേട്ടോ :)  ചിലതിൽ അറിയുന്നവ ഞാൻ പങ്കുവെയ്ക്കുകയും ചെയ്യാം - പക്ഷേ ഇത് ഭക്ഷണ ഓർമ്മയല്ല - എന്റെ ആളോർമ്മകളാണ്.... തീർത്തും വിചിത്രമായ രീതിയിൽ ഞാൻ ഓർമ്മകളെ ഉണ്ടാക്കുന്ന വിധം! 

        അമ്മരുചി ആകട്ടെ ആദ്യത്തേത് അല്ലേ? നമ്മുടെയൊക്കെ രുചിയുടെ ഹരിശ്രീ അമ്മയാണല്ലോ  - എല്ലാവരുടേയും ആദ്യരുചിയോർമ്മയും  അമ്മ തന്നെയാകും .. എന്നാൽ എനിക്ക് അമ്മയുടെ എല്ലാ വെക്കലും ഇഷ്ടമല്ല, അമ്മയെക്കൊണ്ട് തീരെപ്പറ്റാത്ത ചില പാചകങ്ങളും ഉണ്ട്  (ഇത് വായിച്ചു മുഖം ബലൂൺ പോലെ വീർക്കുന്ന / വീർപ്പിക്കുന്ന ആളാണ് എന്റെ 'അമ്മ )  -പക്ഷേ, അമ്മയ്ക്ക് മാത്രമായി പകുത്തു വെച്ച ചില രുചിയോർമ്മകളുണ്ട്. അതിലേറ്റവും ആദ്യം ഉള്ളിത്തീയൽ ആണ് -   കുഞ്ഞുള്ളി കുനുകുനാന്നു ഒരേ വലുപ്പത്തിൽ  അരിഞ്ഞു വെളിച്ചെണ്ണയിൽ വഴറ്റി, തേങ്ങാ വറുത്തരച്ചു  ഉണ്ടാക്കുന്ന പിഴിഞ്ഞ പുളിയുടെ പുളിരസത്തിന്റേയും , വറുത്തരച്ച മുളകിന്റെ എരിവിന്റേയും ,  വെളിച്ചെണ്ണയിൽ വഴണ്ട കുഞ്ഞുള്ളിയുടെ മധുരത്തിന്റേയും പെരുങ്കളിയാട്ടം വായിൽ ഉണ്ടാക്കുന്ന ഉള്ളിത്തീയൽ! ഉള്ളി നന്നാക്കലും അരിയലും  വറുക്കലും ഒക്കെക്കൂടി നല്ല ഒന്നൊന്നര പണിയാണ് ഈ കക്ഷിനേ ഉണ്ടാക്കാൻ.  അതോണ്ട് തന്നെ എന്നും കിട്ടുന്ന വിഭവവും അല്ല. പക്ഷേ, കുഞ്ഞിലേ മുതൽ എനിക്കെന്ന് - ആർഷക്കൊച്ചിന് ഇത് വലിയ ഇഷ്ടമാണല്ലോന്ന് -  എനിക്ക് മാത്രമെന്ന് സ്‌പെഷ്യൽ ആയിട്ട് അമ്മയുണ്ടാക്കിയിട്ടുള്ള ഏറ്റവും രുചികരമായ എന്റെയോർമ്മ ഇതാണ്  - മറ്റൊരിടത്തു നിന്നും കിട്ടിയിട്ടില്ലാത്ത എന്റെ ഉള്ളിത്തീയൽ!  

#രുചിയോർമ്മകൾ 

#100DaysOf Tastes 

#ഉള്ളിത്തീയൽ #അമ്മരുചിയോർമ്മ