പകര്‍ന്നെഴുത്ത്

പിറന്നത്,ആരോടോ കടം വാങ്ങിയ
ഒറ്റക്കുപ്പായവുമായിട്ടായിരുന്നു
വളര്‍ന്നത്, ആര്‍ക്കും വേണ്ടാത്ത
നിഴലിന്റെ കറുപ്പില്‍ ചവുട്ടിയും.

പതിഞ്ഞൊഴുകിയ വെള്ളത്തിനടിയിലും
കല്ല്‌ മിനുങ്ങും പോലെ കൌമാരം
ഇണ പിരിഞ്ഞൊരു മുല്ല മൊട്ടിന്റെ
സുഗന്ധം പോലെയെന്‍  യൌവനം .

ഉറക്കമുണര്‍ത്ത് പാട്ടുകള്‍ക്കിടയില്‍
ആരോ പാടിയ താരാട്ട് പോലെ വിശപ്പ്‌ 
നിറഞ്ഞു തുള്ളി തുളുമ്പുന്ന സ്വപ്നത്തിന്‍
വീഞ്ഞൊഴിഞ്ഞ് ഒഴുകിയ ദാഹം .

എന്നും മറക്കാനോര്‍ക്കുന്ന അസ്തിത്വം,
ജരാനര ബാധിച്ചൊരു പ്രണയം
ഇനിയുമെന്തുണ്ടെന്നിലെ പകര്ത്തെ -
-ഴുത്തിനു തിരി തെളിക്കുവാന്‍...!!